தமிழகத்தில் பிளஸ் டூ தேர்வு முடிவு நேற்று வெளியான நிலையில், விடைத்தாள் நகல் மற்றும் மதிப்பெண் மறுகூட்டலுக்கு, இன்று முதல், வரும் 14-ம் தேதி வரை, மாணவ - மாணவிகள், தாங்கள் பயின்ற பள்ளிகள் மூலமாக விண்ணப்பிக்கலாம் - தனித் தேர்வர்கள், தாங்கள் தேர்வெழுதிய மையங்கள் மூலமாக விண்ணப்பிக்கலாம் என அறிவிக்கப்பட்டுள்ளது.
விடைத்தாள் நகல் கோரி விண்ணப்பிப்போர், அதே பாடத்திற்கு தற்போதே மதிப்பெண் மறுகூட்டலுக்கும் விண்ணப்பிக்கக் கூடாது - விடைத்தாள் நகல் பெற்ற பிறகே, மறுகூட்டல் அல்லது மறுமதிப்பீட்டுக்கு விண்ணப்பிக்கலாம் என்றும் அரசுத் தேர்வுகள் இயக்ககம் தெரிவித்துள்ளது.
பிளஸ் டூ தேர்வில் தேர்ச்சி பெறாதோர் மற்றும் ஏதாவது காரணங்களால் தேர்வு எழுத வராதவர்கள் நடப்புக் கல்வியாண்டிலேயே மேற்படிப்பைத் தொடரும் வகையில், அவர்களுக்காக அடுத்த மாத இறுதியில் சிறப்பு துணைத் தேர்வு நடத்தப்படும். பள்ளி மாணவ-மாணவியர் தாங்கள் பயின்ற பள்ளிகள் வாயிலாகவும், தனித்தேர்வர்கள், தேர்வெழுதிய மையங்கள் மூலமாகவும் வரும் 15-ம் தேதி முதல், 20-ம் தேதிக்குள் தங்கள் பெயரை பதிவு செய்து கொள்ளலாம் என்றும் அரசுத் தேர்வுகள் இயக்ககம் தெரிவித்துள்ளது.
