அரசுப் பள்ளி ஆசிரியர் பணிமாறுதல் கலந்தாய்வு தொடக்கம்

 அரசுப் பள்ளி ஆசிரியர்களுக்கான பணியிட மாறுதல் கலந்தாய்வு புதன்கிழமை தொடங்கியது.

ஈரோடு மாவட்ட முதன்மைக் கல்வி அலுவலகத்தில் கலந்தாய்வை முதன்மைக் கல்வி அலுவலர் பெ.அய்யண்ணன் தொடங்கிவைத்தார். இக்கலந்தாய்வில் பங்கேற்க 580 ஆசிரியர்கள் விண்ணப்பித்துள்ளனர்.

அரசு மேல்நிலைப் பள்ளி மற்றும் நகராட்சி மேல்நிலைப் பள்ளித் தலைமை ஆசிரியர்கள் மாவட்டத்திற்குள் மாறுதல் பெறவும், ஒரு மாவட்டத்தில் இருந்து மற்றொரு மாவட்டத்திற்கு மாறுதல் பெறவும் புதன்கிழமை கலந்தாய்வு நடைபெற்றது.

அதேபோல, உடற்கல்வி ஆசிரியர்கள், கலை, இசை ஆசிரியர்கள், தையல் மற்றும் இடைநிலை ஆசிரியர்கள் மாவட்டத்திற்குள் மாறுதல் பெறவும் புதன்கிழமை கலந்தாய்வு நடைபெற்றது.

அரசு மற்றும் நகராட்சி மேல்நிலைப் பள்ளித் தலைமை ஆசிரியர்களுக்கான பதவி உயர்வு கலந்தாய்வு வியாழக்கிழமை (ஆகஸ்ட் 13) நடைபெறுகிறது. அதைத்தொடர்ந்து 16-ஆம் தேதி அரசு, நகராட்சி உயர்நிலைப் பள்ளித் தலைமை ஆசிரியர்களுக்கான பணி மாறுதல் கலந்தாய்வும், உடற்கல்வி, கலை, இசை மற்றும் தையல் ஆசிரியர்கள் மாவட்டம் விட்டு மாவட்டம் பணி மாறுதல் பெறவும் கலந்தாய்வு நடைபெறும்.

ஆகஸ்ட் 18-ஆம் தேதி அரசு, நகராட்சி உயர்நிலைப் பள்ளித் தலைமை ஆசிரியர்கள் பதவி உயர்வு கலந்தாய்வும், 22-ஆம் தேதி முதுகலை ஆசிரியர்கள் மாவட்டத்திற்குள் மாறுதல் செய்வதற்கான கலந்தாய்வும், 23-ஆம் தேதி மாவட்டம் விட்டு மாவட்டம் மாறுதல் பெறுவதற்கான கலந்தாய்வும் நடைபெறவுள்ளது.

24-ஆம் தேதி மேல்நிலைப் பள்ளி முதுகலை ஆசிரியர்களுக்குப் பதவி உயர்வு கலந்தாய்வும், முதுகலை ஆசிரியர்கள் நேரடி நியமனமும் நடைபெறுகிறது. ஆகஸ்ட் 26 முதல் 29-ஆம் தேதி வரை பட்டதாரி ஆசிரியர் பணி நிரவல் கலந்தாய்வு நடைபெறவுள்ளது.